Guidar_2/REV.18.txt

1:Dərɓaga aska, nulak maslay maɓɓan dawpriken sə disiŋ. Tay də sembe diiɗa, gakdak nan akekeɓe'ək dələv pakə.
2:Aslanək wəlani, amna: Aɓəslka! Walaŋ gəla metiŋ na Babilon naki dəɓəslə. Walaŋ gəla nan akpaŋgək kakaŋ kan təki nasuwa net tuyeŋɗe, dit əmpəsɗe mbreyit en temtemi, dit biŋgeɗ mbreyit ko awet di pakə, dit en naw see'* pakə tahəŋ wəssoŋ adaka.
3:Vi walaŋ gəla nan apsitik mbazla nan sit ɗii pak asaanənka, mbazla nan tatrahaɓɓa va wənah na: Sunu nanəŋ mbraynəŋka. Məlĩyeŋge na dələv pak aɗɗaŋgək mana'a dəni, məɗɗaŋ terere na duniya pak abaŋgək arya dəsunu nani ha meŋge nan tay ɓa.
4:Yaŋ nəpprəm wəla ɗəf maɓɓan sə disiŋ, yaŋ adawnah na: Məgili munokum ɗii nawa, məgil suwalaŋ gəla nani. Kədawsapaŋ dəndən adəv mambray nan ɓa. Vi konoy nan adaw rəhkum ɓa.
5:Vi mambray nan diiɗayi, arbanək zən ha agapək a disiŋ, Maŋgəlva dəsgət ki wəza mambray nan ɓa.
6:Məgəɗsən walaŋ gəla nan va agəɗ sukum tamə, məɗɗasən təl sula va aɗɗa sukum, məknahsən makasli naw saa zəga nan paah an tatrah day kiyən nan təl sula an məs azaɓan vikum.
7:Va aɗɗa gakdak naneken zən də zəga nanəŋka, say wəzəm saha nan də wəska morkoyo nan dəsan akan diiɗa, vi adawnah amakran na: Yaŋ kan əntat tuŋgo, əntə ma'aykə, bərviyak nan ɓa, nəskəna ɗaah morkoyo ɓa.
8:Vi vaski bonoyɗe tahəŋ wəganəni waɗɗaŋ akan pay taka pakə, gbəgbaɗe, wəska morkoyeɗi, gəm maaya, kawzlani də offo, vi Maŋgəlva Ɗəfdaya məs dətaw kita akan metiŋgini.
9:Məlĩyeŋge na dələv məs dədawsapaŋ dəndən wəɗɗa mana'a də sunu pakə, wahəmaŋ wanzlaŋ vamvəlla an awlanənək enene məs dədaw gilyoŋ dawzlani.
10:Waziweŋ faraɗa, vi ageslne'eŋgək sən bonoy nani, wanəhaŋ na: Kay! Kay! Babilon walaŋ gəla metiŋ, walaŋ gəla metiŋ məs də sembe, adəv ler taka mətaw kita akoko.
11:Məɗɗaŋ terere na dələv wahəmaŋ, wanzlaŋ vamvəlla, vi ɗəf tay nalbaah zigeɗ net əmpa ɓa.
12:Meleŋge, təbəs net deleɗi, kuneŋge na sləma, averzleɗi dit turmiɗe dit lukutɗe preŋpreŋɗe dit məzu wiɗeŋ, dit lukutɗe peppreŋ witwiti, dit wəleŋɗe məzaɓet temtemi, dit zigeɗ məɗet də gozlo bekne gəm wəleŋɗe na sləma, də təbəs peppreŋge, gəm təbəs titire dit kuneŋge asta.
13:Gəm sitaɗe nenekɗe, də mel nappaya, də tursan na mirra, də tursan na gaŋgəlya, də mbazla net wəleŋɗe, də mele gəm gəpa na alkamari, daga wasliɗe, timeŋgiɗi dit pəlseŋge nakdəh mawta, dit pəlseŋge dit balemɗe ko dit zeŋgillet ɗiiyen pakə.
14:Məɗɗaŋ terere wanahaŋ na: Zigeɗ nok moget məs kəŋgəl nawrəh nek pak azaŋka. Arya noko dit zigeɗ naneken zuk pak məs kəda neken zuk dənɗaŋ pak azaŋgək sə ma horok pakə, kulene ɗaah əmpa ɓa.
15:Abaŋgək də arya daɗɗa terere awalaŋ gəla nani, waziweŋ faraɗa, vi geslne na bonoy nani. Wahəmaŋ, wanzlaŋ vamvəlla,
16:wanahaŋ na: Kay! Kay! Walaŋ gəla nan aguluk lukutɗe baberɗe, dit lukutɗe preŋpreŋ gəm lukutɗe peppreŋɗe. Azaɓanək zən də meleŋge gəm kuneŋge na sləma dit averzleɗi.
17:Adəv ler taka kaaka'ə aryeɗ nok pak azaŋka. Ɗii məs dit bəlayɗe məzədoŋ təki dənɗaŋ dit məzəŋ korotini ndəɗaŋ pak arəhaŋ na riba net də malaka aket iŋkile aməlpa əmpa ɓa, waziweŋ faraɗa,
18:anzlaŋgək vamvəlla, adan awlenin enene məs dədagilyoŋ səkəti məs walaŋ gəla adawzlaŋka. Aɓɗaŋ na: Walaŋ gəla tay maɓɓan dəslə dəndən ɓa.
19:Agbo'ənək hologudum azeti askaŋgək morkoyo ahəmaŋka: Kaya! Midi haya! Walaŋ gəla metiŋgini. Ndəni walaŋ gəla metiŋ məs bəlayɗe net iŋkile pak abaŋ də arya nani. Ler taka kaaka'ə zigeɗ nadəvən pak azaŋka.
20:Disiŋ aneken zuk də wəray na walaŋ gəla nani. Məneken zukum munokum ɗii na Maŋgəlva, masləŋɗe dit məs kleŋɗe, Maŋgəlva atawək kita aka walaŋ gəla naka amndagan sənək an məs agəɗ sukum pakə.
21:Yaŋ maslay məs də sembe agəm gərəm metiŋgin va buwən naw səra, asganək aməlpa metiŋgin amna: Babilon walaŋ gəla metiŋgin kasgokki vaska, kawluki ɗaah əmpa ɓa.
22:Ɓaɓilmet məzubayaŋ gazamvəl dit məyaŋ gəlya dit məffoŋ mohoŋɗe dit məffoŋ alagayteɗi kapprəmiti ɗaah anokda ɓa. Ɗəf tay nawrəh məzaɓ zəga nawzəm riba awalaŋ gəla nan ɗaah ɓa, kapprəmi ɗaah ɓaɓəlmet məzusəraŋ awalaŋ gəla nan ɓa.
23:Kawlani ɗaah təki babar na pitirla awalaŋ gəla nan ɓa, kapprəmi ɗaah gugoyo net məgəmaŋ gili dit məgəmaŋ zel awalaŋ gəla nan ɓa, məɗɗaŋ terere diiɗaŋ anokda kəta adayaŋgək kiyit məɗɗaŋ terere na dələv pakə, də sokene nawa tepelke, areketik ɗii naka dələv pakə də wənnani.
24:Mətawi kita aka Babilon walaŋ gəla metiŋ məs dəzi mbel net məs kleŋɗe dit ɗii na Maŋgəlva, va wənah na mbel net ɗii məbeyit naka dələv pak akani.