Guidar_2/2TI.3.txt

1:Aɗumon wənnan lewlewi, aba wəgrak na dələv na, wən tattuwãh wagəɗə.
2:Gesiŋ ɗii wasoŋ məŋgluwən zit kaaka'ə də wəsimeŋ deleɗi, mulanən ziti, məgakdakanən ziti. Waretin ɗii meɓɓeti, apprəmənən na met migilit ɓa, ko naway aɗɗaŋ sənən na soko ɓa. Agakdakanən na zəga an salala* ɓa.
3:Wəŋgla taya zet ɓa, awlaŋ saha aket ɗii ɓa, net say uwaŋ tepelke, armanən zit ɓa, ɗii net wənnet tuwãhyi, wazelin wən mogoni.
4:Wasoŋ məzuzəmaŋ kiyit ɗiiyi, aɗumonən na wənna wəza net ɓa, amma waɗɗaŋ ana gakdakan ziti, waŋgluwən nenek na gəɓa zit dayki Maŋgəlva.
5:Keret ɗii na məzəsbanən Maŋgəlva naməŋ, amma tahəŋ wəzelenən gakdak nani. Azar səzet ɗiiyen veski.
6:Ɗii meɓɓet suweleŋgit tahəŋ wətoŋgoŋ adəv gəla net ɗiiyi kadawmbəɗet dərwa net gili. Də wəɗumon sit na mambray net diiɗayi sawɓa, vi kakdihit adəv wəsim zəga temtem pakə.
7:Gil net tahəŋ wəkayaŋ tive pay pakə kawyagan zəga, amma agapaŋ na aza wəsən an də goŋga ɓa.
8:Va maay Zannes də Zamberes atakən Moyis. Vaski ɗiiyiŋ bo adawtakən goŋga. Maɗulet arayka, ɗii ɗarəŋ adəv wətaf neti.
9:Amma arəhaŋ na wəmbataŋ abe ɓa, vi dərwa net warban zən aza ko naway pakə, va dərwa na Zannes də Zamberes bo arban zəni.
10:Amma noko, kəsbanək wəsən nawa də wədaw nawa, də an nədaɗum səni, də wətaf nawa, də an nədawga də wəŋgla nawa, də an nədaw ɓəsa.
11:Bonoy naw də wəzəm saha nawa, kəsənək məs dərəhu a Antakiya də Ikoniya də a Listira, saha an tattuwãh nəzəm adakəŋka. Amma də as pak Ɗəfdaya kohguwəka.
12:Ko naway də sap də Zezu Krestu manaka san də geslne na Maŋgəlva azani. Gesiŋ bo, kawzəm gəni saha.
13:Amma məɗɗaŋ wəza mambraya, məs vurmɗe wambataŋ abe abe pay pak də mambray neti, wambəɗetin ɗii meɓɓeti, wambəɗanən zit tusso.
14:Amma noko asok də goŋga aza zəga məs kəyagani, də zəga məs kətaf də zuk soksoku.
15:Kəsənək ɗerewel na Maŋgəlva səka suɗike noko. Ndəni dədarban suk tive na kohəŋka, an mətafək Zezu Krestu, kisinik ɗii məs dəraban sukun zəga vani.
16:An məs məverin adəv ɗerewel nan pak də hənhən na Maŋgəlvayi, wabaahə də wərban goŋga, də wərban an məs məzlaɓ akani, də wəzaɓan mambray məs məɗɗani, də wərban wən an Maŋgəlva aŋgələ.
17:Vi ɗəf na Maŋgəlva pak wasan təstəssə, azaɓanək zən naɗɗa wəza mogon pay pakə.