Guidar_2/COL.1.txt

1:Letərəŋka, Pol dəsləna, nan bo masləŋ na Zezu Krestuwi də wəŋgla na Maŋgəlva, in də Timote məlməmə.
2:Letər nan azet ɗii na Maŋgəlva a Kolosiyen nəsləna, milmiŋgiɗəm məzəsbanən Krestu də goŋga. Maŋgəlva Affəm dəpsukum mbəlembəle də zam nani.
3:Pay pak mənam tatə zuli vikum, mənam tatəɗɗa soko sən Maŋgəlva Affən Ɗəfdaya nam Zezu Krestu.
4:Məpprəmək wənnawtaf nokum məs kətafən Zezu Krestu, məpprəmək bo va kəŋliwin ɗii na Maŋgəlva pakə.
5:Pay sən labara na Wən Nenek agap anokumda, dabəŋ mərban sukum wənna wəga zəga nani. Ndəni bo wətaf nokum də wəŋgla nokum pak kəɗiyənək aka zəga məs kədawgaŋ, məs Maŋgəlva azaɓan sukum a disiŋ.
6:Ɗii tahəŋ wərbanən Wən Nenek amba dələv pakə, wənnan tay ki zəzay sit ɗiiyi. Vaski bo anokumda, daga pay labara na mbəlembəle na Maŋgəlva agap anokumda dabəŋ nani, daga kətəŋ gən wəsən labara nenek də goŋga.
7:Səma Epafras kədapprəmən wənnani, məzəɗɗa wəza də mənamə, ɗəf təstəssi, məgəɗ wəza na Krestu vikum.
8:Ndəni dənah səm wənna wəŋgla nokum məs Əmpəs na Maŋgəlva apsukum.
9:Vi wənnani kan mədakkaman Maŋgəlva, səza məpprəm labara nokum. Mənam tatəkkaman Maŋgəlva, dərban sukum gən wəŋgla nan pakə, dəpsukum gən maɗula naw sənən də Əmpəs nani.
10:Asna wakə ɓapən wəɗɗa an va Ɗəfdaya aŋgələ, an məs dəslə azani. Wədaw nokum wanzlər gən wəza mogon temtemi, wəsən Maŋgəlva nokum wambat abe abe.
11:Maŋgəlva wasɓokum də gurom nani, də sembe nani, də gakdak nan metiŋgini kəɓəsən gən zəga pakə.
12:Say məgəɗ sən soko sən Ɗəfdaya də zukum neki vi ndəni dəɗɗukum ka kəɓapən gən wərəh zəga mogon pak məs azaɓan sit ɗii nan adəv məlĩ natəki babara.
13:Yaŋ agil gəm səra gakdak na guzliyo, atoŋgəm adəv məlĩ na Wətən an məs aŋgələ.
14:Də Wətənni mərəh kimə, də wəviyan mambray namə.
15:Krestu tayərban səm Maŋgəlva məs awlanən ɓa, vi Krestu van agilik va ndəni. Ndəni Tizi na zəga məs Maŋgəlva azəməɗ pakə.
16:Dəni Maŋgəlva azəməɗ zəga pakə, na disiŋ də annaka dəlva fuŋ pakə, an məs hara ɗəf adawlay kaaka ɓa, amma də an məs hara ɗəf awlan ɓa pakə, va wənəh na sembeɗ dit məlyeŋge, dit ɗii gakdekɗe na disiŋ pakə. Də Krestuwi Maŋgəlva azəməɗ zəga pakə vini azəməɗ zigeɗ veti.
17:Krestuwi dabəŋ kiyit zigeɗis pakə, vini məɗɗa zigeɗis pakə.
18:Ndəni daya net kretiyenɗe nan pakə, məs dəsoŋ gəɓa zəni. Ndəni dətəŋ gabba zeŋgille meleketeni, vi Maŋgəlva asil gənək sətəki əmta dabəŋ, akpaŋganək dabəŋ ki zəga pakə.
19:Vi Maŋgəlva aŋgələk kpak nan dəsan gən adəv Wətən grakə. Də sembe nan pakə.
20:Ndəni dəŋglu wəsleren zəga pak məs agəɗə, dəndəni Wətən aɗɗa wəsler nan də mbel nani, amtək aka wəlaŋga məzliwrihe. Vaski Maŋgəlva agrak wəsleren zəga na duniya pak dəndən, ko na fuŋ ko na disiŋ.
21:Daga laŋka məzuzeleŋ na Maŋgəlva kənanaŋ, vi wənna wəza nokum mbrayen, də wəɗum nokum mbrayen. Faraɗa kənanaŋ səza Maŋgəlva.
22:Amma kakaŋ kana, Maŋgəlva sən kiyən azaɓanək wən nokum, də Wətəni, akpaŋgək ɗəffa, amtəka, vini kan kəkpaŋgaŋ ɗii nan təstəssə məza də mambray azokum ɓa.
23:Amma say mədoŋ abe abe də wətaf wənnani, məmpa tulkum adəvən. Kədaw ngereŋ wən maɓɓan wəzar gukum səza məs kədawgaŋ ɓa, məs kərəhaŋ pay məs kəpprəmən labara nenek ɓa. Ɗii na duniya pak apprəmənək wənna labara neneke. Yaŋ Maŋgəlva anah suwa, in Pol, nərban gən wənnani.
24:Kakaŋ na zu neki də bonoy naw vikum, kəsənənka Krestu asək bonoy də gəɓa zəni, va wənah na kretiyenɗe nani, dewle say dəsə gən bonoy vaska əzəm saha nan pak vikumi ndəni haran naw aza bonoy nani.
25:Maŋgəlva aɗɗuwək məgəɗ wəza net kretiyenɗe. Anah suwəka nərban gən wənnan pakə, ka dətər sukum gən wəraya.
26:Daga wətəŋ na duniya, Maŋgəlva aɗamanək wənnan sit ɗii pakə. Amma kakaŋ na arbanək wən məɗaman nak sit ɗii nan kana.
27:Yaŋ kan Maŋgəlva aŋgələk wərban gakdak na wən məɗama nan metiŋgin məs azaɓan viyit ɗii pakə. Wən məɗama nan vani, ndəni Krestu məs namakrokum, ndəni dəpsukum wənnawga zəga, narəh haran nokum aza gakdak na Maŋgəlva.
28:Ndəni kan mədawpel wənna Krestu wəŋ sit ɗii pakə. Mənam tatəsakan sit wənnani, də wərban sit wənnan də zəga nawsən pak məs Maŋgəlva apsəmə, vi məziw giti gən aba Maŋgəlva ko naway pak va ɗəf metiŋgin adəv wəsap də Krestu.
29:Vini nədaɗɗa wəza də wəgay vini, də sembe məs Krestu avayə, ndəni də daɗɗa wəza nan amakrawa.