Guidar_2/2PE.3.txt

1:Bayneŋgiɗwa, aŋki ɗerewel an nəver sukum ma sula'ən, adivit ɗerewelɗe net sula git pak na, nəŋgəl kaɗumon sukum, kaw sil gən maɗulokum mogoni, ɗe əɗumon sukum aka zəga məs kəyaganəni.
2:Nəŋgəl na kəɗumonən gən wən an məs kleŋɗe salala apeleŋ lahəŋka, də dawka na Ɗəfdaya məzu koh gəmə, də əpel məs ɗii məsliŋgit azokum aki sukuməni.
3:Kəsənən gən tagay na, pay wəgrak dəlva, ɗii meɓɓet wazoŋ məzə soŋ adəv əŋgla na gəɓa ziti: Wamasaŋ akokum.
4:Wanahaŋ na: Minani wənnan wade, vaski ɓasa? Ya ngay kan di? Daga səzet migilmə ha kakaŋka amtaŋgək səkay, amma zəga pak dəkpaŋ ɓa, vaŋki daga məɗɗa dəlva fuŋ!
5:Asgətaŋgək ki disiŋ də dəlva fuŋ daga far fari, dəlva fuŋ səret iŋkile agili, aziwik aket iŋkile də əpel na Maŋgəlva.
6:Vaski dəlva fuŋ məsvan azanək dit iŋkile məs adawyaŋ na iŋkile dənzləŋgaŋ.
7:Amma disiŋ də dəlva fuŋ an kakaŋkiŋki, də wəpel na Maŋgəlva vani asuwaŋ tagay vi kagrekit də offo. Məzeɓeti ha pay nawtaw kita aket ɗii mbreyit də wəzeti.
8:Amma bayneŋgiɗwa, kədasgətaŋ ki wən takas ɓa, vi Ɗəfdaya awɗakan pay taka də wəsva dubu ɓa. Azana zəga takayi pakə.
9:Ɗii meɓɓet tahəŋ əɗumoŋ na Ɗəfdaya tay liya daɗɗa an məs annahə, amma vaski ɓa, awli gən ɓa. Amma tay ɓəs sukum vi dəŋgəl ko naway dəzə gən ɓa, say ɗii pak dəzoŋ gən də tubiyaŋ gəni, dəppanən gən mambray neti.
10:Də as pak na, pay wəziya na Ɗəfdaya tay va məhal adazani. Dəpasna disiŋ watray də gugoyo metiŋgini, ngərzleɗ na disiŋ pak wazlaŋ pak də offo dəlva fuŋ bo zigeɗ nadəvən pak wazaŋ.
11:Adan zigeɗ pak wazaŋ vaska, kəsənənək va kədasoŋ. Say məsoŋ adəv salala, məsban Maŋgəlva də goŋga.
12:Dawga pay nani, məgəɗ wəza pay nan dəgap gən gu'u, va wənah na pay məs disiŋ adawzla də wəzza, ngirzleɗ bo wewereŋ sənən offo.
13:Amma Maŋgəlva amna wapsəm disiŋ meleketen də dəlva fuŋ meleketeni, adak na mambray tay ɓa, vi əŋgla na Maŋgəlva tayadaka, anani mədawga.
14:Vi vaski bayneŋgiɗwa, dawga pay naməŋka məsok zukum kəsoŋ gən salala, məza də mambray azokum ɓa aba Maŋgəlva, məsoŋ zay dəndəni.
15:Məsən na əɓəs na Ɗəfdaya akol sukumək ma tive ka kəkohoŋ gəni, va məlməm namakram Pol aver sukum də maɗulan məs Maŋgəlva apsəni.
16:An məs aver adivit letərɗe nan pak atəki məs adaw pel aka wənəŋka, atəki maɓɓan temtem tuwãhi wəpprəma, ndəni kan ɗii məs dəsənaŋ zəga ɓa, məs tahəŋ də wəɓəs zit naw sənən ɓa, yaŋ ada kpaŋganən wənnani adawray gitini, va adaɗɗaŋ dit ɗerewelɗe məverit meɓɓeti. Də əɗɗan vaski adaw kiyən kita aketi kawzan ziti.
17:Amma munokum bayneŋgiɗwa, kəsənənək wənnan dabəŋ. Məzi zukum, vi ɗii məs aɓe'eŋ sənən Maŋgəlva ɓeŋ adawtoŋ gukumən adəv mambray net kapan wədaw nokum də sembe mogonəŋ ɓa.
18:Amma məsok zukum məɓay adəv mbəlembəle də wəsən na Ɗəfdaya məzu kohgəmə, ndəni Zezu Krestu. Gakdak nani daga kakaŋka ha faɗə. Amin.