Guidar_2/EPH.6.txt

1:Kirni, məpprəm met migilkum vi wənna əsap nokum də Ɗəfdaya. Vasna mogoni sawɓa.
2:Aɓe sən affuko dət moko, ndəni ma henziŋ an dabəŋ məs dəde akani, ndəni bo zam.
3:Vi kərah gən zamə kənzi gən diiɗa aka dəlva fuŋ.
4:Munokum migilit kirni, kədaw danən gidivit kirtukum ɓa, amma məŋliwe də wəsrikgiti də wərban sit wənna Ɗəfdaya.
5:Munokum balemɗe məpprəm met dayeɗe nokum məs na duniya, də geslne də wəkkere, də mokrokum taka, va kədapprəmən ma Krestu.
6:Məpprəm meti, say dereti kaaka vi dəŋglaŋ gən wən nokum ɓa, amma məɗɗa wəŋgla na Maŋgəlva də mokrokum taka, va balemɗe na Krestu.
7:Məsok zukum wəɗɗa wəza na balam nokum va sən Ɗəfdaya məza va sit ɗii ɓa.
8:Say məsənna wəza mogon məs ɗəf agəɗ pakə, ko ɗəf nan balami, ko balami ɓa, annani adaw rəh aba Ɗəfdaya.
9:Munokum dayeɗe net balemɗe, kədaw bayaŋ sitin gagay ɓa, kəsənənka Ɗəfdaya nokum na disiŋ nan kənanaŋ pak dənɗaŋ, munokum dənɗaŋ pak aban kənanaŋ ɗii pak dakadakaŋ azani, vini say məsoŋ dənɗaŋ va an dəslə.
10:Abeŋ na, musok zukum aza əsap nokum də Ɗəfdaya, məppan sembe nan metiŋginəŋ dəsɓokum.
11:Məgəm zəga naw gay na Maŋgəlva, vi kərəhaŋ gən wəziw aba kuket na Satanni.
12:Vi əgay nam dit ɗiiyi ɓa, amma dit əmpəsɗe mbreyit məs nakawalaŋ disiŋ də dəlva fuŋ, məs dəsoŋ məlĩyeŋge də sembe pak neti, adəv payan kakaŋkəŋka məs dəsan guzliyəŋka.
13:Vi aski məgəm zəga naw gay na Maŋgəlva, vi kəziweŋ gən aba məzuzelkum payan mbrayen adazani. An kətakənək wəla zəga pakə, asna akəsoŋ faɗə.
14:Vi vaski məzi zukum, minan dadakkum də goŋga, mugul təstəs azokum va lukut nawgaya,
15:məkpa hesek də wəŋgla naw pel Wən Nenek na zamə.
16:Vas kana wətaf nokum dəsan baray nokum, məs nawtak herɗe na ɗəf mbrayen darɓəzlaŋ azokum.
17:Məŋglu əkoh nokum dəsan gən va mbəlore na təbesa, mərma əpel na Maŋgəlva dəsan gən va kafahi məs Əmpəs na Maŋgəlva adapsukum.
18:Məɗɗa vas pak də wəzuliya. Məkaman Maŋgəlva də baah sukum gəni, məkaman pay pakə, va əmpəs nan ayagan sukum. Məga kədapanən wəzuli viyit ɗii na Maŋgəlva pak ɓa.
19:Məzuli viwa: Vi nəpel gən wən məs dəslə, vi nərban gən wən məɗama na Wən Nenek də zu soksoku.
20:Ko də nəsaw mədaŋgay kakaŋ zlaŋ, masləŋ nani ka nəɗɗa gən wəza na labara Neneke. Mezuli viwa ka nərban gən də zu soksoku va annah su nəɗɗa gəni.
21:Tikikus məlməm məs məŋgələ, məgəɗ wəza na Ɗəfdayayi də goŋgayi aza zəga pakə, wannah sukum va nəsawa də an va nədaɗɗa.
22:Vini nəslən azokum də nah sukum gən va məsam pakə dəə məs gən əpsukum sembe nasɓan mokrokum.
23:Maŋgəlva Affən də Zezu Krestu, Ɗəfdaya dəpsit zam nani də əŋgla məs dəde səza wətafa, sit milmiŋgiɗəm pakə.
24:Mbəlembəle na Maŋgəlva dəsan aket ɗii məs dəŋgluwən Ɗəfdaya nam Zezu Krestu də əŋgla məs awray ɓa.