Guidar_2/REV.1.txt

1:Adəv ɗereweləŋka, məverini wən məs Zezu Krestu arbani, də zəga məs Maŋgəlva arbansəni, vi dənah sit gən məɗɗaŋ wəza nani an məs dədaɗɗa kakaŋka, Krestu aslənək maslay də wənnan aza Zaŋ məgəɗ wəza nani.
2:Zaŋ annəhək wənna zəga məs awələ, də wəŋɗan wən məs dəde səza Maŋgəlva, də goŋga məs Zezu Krestu arbansəni.
3:Zəzay aza ɗəf məzəŋɗan ɗereweləŋka, zəzay azet ɗii məzəpprəmən wənnet məs kleŋɗe də wən məs məverin adəv ɗereweləŋka, vi pay məs məɗiyən ka wənnəŋ dəgəɗ gənəŋka, go'oy.
4:In Zaŋtə nəver wənnəŋ azet kretiyenɗe buhul naka dələv na Asiya: Maŋgəlva məs kakaŋka, ndəni məs dəsan laŋka də məs dədazani, dəpsukum mbəlembəle də zam nani, də Əmpəs buhul məs dəsoŋ aba mazaŋga nani.
5:Səza Zezu Krestu, məs dəgəɗ saydawa də goŋga. Ndəni dabəŋ kiyit ɗii mimtiti, ndəni məlĩ aket məlĩyeŋge naka dələv pakə. Aŋgəlməka, kawgil gəm sədəv mambray nam də əmta nani.
6:Aɗɗəmək məlĩyeŋge məs dəlveŋge, ka məgəɗ gən wəza vi Maŋgəlva. Affən gakdak də sembe pak dəsan na Zezu Krestu ha faɗə. Amin.
7:Awla tayəzan aka slay buna, ɗii pak wawlanəni. Dit ɗii məs dəppanən wənnan pak zlaŋ wawlanəni. Ɗii naka dələv pak waskaŋ morkoyo aka wənna əziya nani. Vaski wagəɗ vaska.
8:Ɗəfdaya Maŋgəlva amna: Amin. Əntə A, əntə Z. Ɗəf məs kakaŋka, məs laŋka'a, də məs dədazani.
9:Əntə Zaŋ, məlmukum məs də sap də Zezu, əntatə daw də munokum adəv bonoy, də məlĩ namə də wəɓəsən pak məs taka də munokum. Məɗi wi aka mətuwəra məs adawyaŋ na Patmos, vi nədarban wənna Maŋgəlva də goŋga məs Zezu anahə.
10:Pay na Ɗəfdaya, Əmpəs adek akawa, yaŋ nəpprəm wəla ɗəf dərɓagaw dayadaya, də ɓaɓəl man va gozloro.
11:Amna: Aver zəga məs kuwələŋ adəv ɗerewel, aslən ɗerewel nan azet kretiyenɗe buhul naka dələv temtemi, na Efesus, na Samirna, na Pergame, na Tiyatira, na Sardis, na Filadelfiya, də na Lawdikiya.
12:Yaŋ nəkpaŋgan haraw vi kawla ɗəf məzupel suwa. Yaŋ nula təbəs na meleŋge, dit pitirleɗ məlewit azan buhulu.
13:Awalaŋ zəga məlaw pitirleɗ nek bo, foto tayadaka, agilik va ɗəffa, aguluk lukut metiŋgin zezek nan ha aka gəɓa tələn, aynanək dadakən də kətu məɗɗan də təbəs na meleŋge.
14:Muhur kiyən babar kaɗɗak kaɗɗak va zenze walla va ɓeɓɓrezle, haran va anzil offo,
15:tələn tay va təbəs peppreŋ məzu wiɗe, va an məzu həs atəki nawhəsən. Wəllan ɓaɓəlman tay va ɓaɓilmet iŋkile a məlpa.
16:Ngərzleɗ tahəŋ buhul dəka van dəzəŋ kãwwã, kafahi məs man sula agilik səmani. Haran pak tay wiɗ va paya.
17:Səza nula vaska, nəsbərək amba tələn afuŋ va məmtuwa. Aɗiyək van dəzəŋ akawa amna: Kənzok geslne ɓa. Əntə wətəŋ na zəga, əntə bayma na zəga nani.
18:Əntə ɗəf madarani, nəmtək laŋka, amma kakaŋ na madaraw nan ha faɗə. Əntə də sembe aka əmta, də aka təki məs ɗii mimtit adadoŋgu.
19:Aver zəga məs kədawla, də zəga an məs kakaŋka, də zəga an məs dədaɗɗa ba'ə.
20:Mbar aŋgəl wənah də wənnet ngərzleɗ buhul məs kədawla aza vaw dəzəŋ kãwwã, də təbəs na meleŋge dit pitirleɗ bulul məlawit azan di, ngərzleɗ buhul ndəɗaŋgeŋ maslayɗe net kretiyenɗe buhulu, pitirleɗ buhul bo, tayərban gəla na zuli net kretiyenɗe buhul.