Guidar_2/1CO.3.txt

1:Milmiŋgiɗwa, nəpel sukum va ɗiiyen də Əmpəs na Maŋgəlva ɓa, nəpel sukumək va ɗii na duniya, va kirin memeɗeŋɗe kənanaŋ aza wətaf net ɗii na Krestu.
2:Momvoyi nəpsukum məza zəga nawzəm kəkərtəh ɓa, vi kəɓlaŋ ɓa. Kəɓəsən na ɓa, ko kakaŋka kəɓəsən naɓa'a.
3:Vi ədaw nokum tay va net ɗii na duniya. Adan kotorok də əgay taya waloŋkum, vasna kərbanənək zukum na, ɗii na duniya kənanaŋ ɓa sa? Yo ədaw nokum bo ana gəɓa zə ɗəf aŋgəlli.
4:Vi ko naway suwalaŋkum tay nah na: Naw na Pol nani, ɗəf mbərən tamə, naw na Apollos nani. Vasna munokum tatəɗɗaŋ va net ɗii na duniya adaɗɗaŋ ɓa sa?
5:Naway Apollos di? Naway Pol di? Nam məɗɗaŋ wəza na Maŋgəlva mənan ɗarə, ɗii gugiriɗ mənan ɓa, ɗii məs nabaah sukum kəsoŋ gən məs məkpaŋgokum kəsoŋ gən ɗii məs dətafən Maŋgəlva mənani. Ko naway suwalaŋgəm pak tayəɗɗa wəza nan məs Ɗəfdaya apsən naɗɗa.
6:Naw nəslgak zemve, Apollos azi sənək iŋkile, amma Maŋgəlvayi dədawgil gən zemve də əɓay gəni.
7:Vaski bo, ɗəf məs dəslga, də ɗəf məs də zi sən iŋkile pak ɗarəŋ: Maŋgəlvayi day pakə, vi ndəni dədawgil gən zemve.
8:Ɗəf məzəslgani, də ɗəf məzə zi sən iŋkile dakadakaŋ pakə. Maŋgəlva wapsit iya neti, ko naway wapsən va aza wəza nan agəɗə.
9:Sula gəm pak ɗii məɗɗaŋ wəza na Maŋgəlva mənani, munokumtə guli na Maŋgəlva. Də wən məkpaŋga maɓɓan bo: Munokumtə bo gəla na Maŋgəlva.
10:Va mbəlembəle məs Maŋgəlva avayə, nəɗɗak wəza nan va mərkə gəla mogoni, nəɗiyək gabbani. Kakaŋ na ɗəf maɓɓani məzərkan akani. Amma say ko naway dəzi gən zən aza wərka nan va adarkani.
11:Vi Maŋgəlva aɗiyək gabban səkay, ndəni Zezu Krestu, ɗəf tay naw ɓap wəɗi gabban nan maɓɓan ɓa.
12:Ɗii meɓɓet na, tahəŋ wərkanən akan də təbəs na meleŋge, walla də təbəs net deleɗi, walla də gərəm na sləma, ɗii meɓɓet bo tahəŋ wərkanən akan dit wəleŋɗe, walla də marbaza walla dit kiste.
13:Vaskana, ko naway pak wəza nan warban zən payan məs məɗiyən vi kita, vi payan dəpaska, offo warban wəza na ko naway pak va aɗɗa, offo wasla wəza net ɗii taka taka pak va asani.
14:Ɗəffan dərka aka gabban mətəŋgən məs aw geslne sən offo ɓa, asna nan warah iya nani.
15:Amma an offo azlak wəza na ɗəf nani, nan azək səmbra iya nani. Ndən sən kiyən na, wakohu, amma sahasaha adagaɗ ki offo appaka.
16:Munokumtə gəla metiŋ naw zuliya* sən Maŋgəlva, kəsənən na Əmpəs na Maŋgəlva taya makrokum ɓa sa?
17:Ko naway dəray gən gəla metiŋ naw zuliya sən Maŋgəlva, Maŋgəlva wazan ɗəf nani. Vi gəla metiŋ na zuli sən Maŋgəlva Salalayi, munokumtə gəla metiŋ na zuli sən Maŋgəlva vani.
18:Ɗəf adazlaɓan zən ɓa, an ɗəf suwalaŋkum tayula zən va məsən zəga na duniya, say dəkpaŋ dərwa, vi dəsan gən məsən zəga.
19:Vi wəsən zəga na duniya, zəga na dərway ara Maŋgəlva, Ɗerewel amna: Maŋgəlva tayərme məsənaŋ zəga na duniya də mazaɗ na kuket net tusso.
20:Ɗerewel anahək əmpa na: Ɗəfdaya asənək əɗum net məsənaŋ zəga, əɗum nan awtər wəray ɓa.
21:Vi vaski ɗəf adaw gakdaket ɗii də zəga məs ɗəf adaɗɗaŋ ɓa, vi zəga pak nokumi.
22:Ya ko Pol, ko Apollos, walla Piyer, walla duniya, walla zeŋgille, walla əmta, də ənziya an kakaŋka də an nawmbat abe pak nokumi,
23:amma nokum bo, na Krestu kənanaŋ, Krestu bo, na Maŋgəlvayi.