Guidar_2/1CO.4.txt

1:Say muləm va məɗɗaŋ wəza na Krestu, va ɗii məs Maŋgəlva apansit wən məɗama nan aveti.
2:An məs ada sohoŋ ava ɗəf məs məppan sən wəza van na, aŋgəl dəsan gən də goŋga.
3:Amma nawa, ɗəf tay nawtaw kita akaw suwalaŋkum ɓa, ko ɗəf maɓɓani, naw bo nətaw na kita aka zu ɓa'a.
4:Vi naw bo makraw də nah su kita naw ɓa, vi in bo salala nan ɓa'a. Amma Ɗəfdayayi nataw kita akawa.
5:Vi vaski kəda tawən kita aka ɗəf dabəŋ ki pay məɗiyən ɓa, məga Ɗəfdaya dəde gən paysa, warban an dəɗam ara guzli pak atəki babara, də wəgil gən wəɗum məɗama na mekret ɗiiyi. Asna Maŋgəlva wagakdakan ko nawa pak va aza wəza nan agəɗə.
6:Milmiŋgiɗwa, wən məs nədawnah pak nənah sənək Apollos də zək naw pakə, vi karban sukum zəga. Nəŋgəl na kulanən gən də ədaw namə, vi kəda toŋgoŋ ki an məverin ɓa, vi ɗəf suwalaŋkum ada gakdakan ɗəf maɓɓani, ndən mba gən ɗəf maɓɓan də wəzelen ɓa.
7:Naway dəɗiyuk daykiyit ɗii di? Maŋgəlvayi dupsuk anna vok ɓa sa? Adan vaski na vimi kədakaɓ də zəga navok va kəmna Maŋgəlvayi dupsuk ɓaŋ di?
8:Kakaŋ na kərəhənək zəga məs kəŋglaŋ pakə. Kəkpaŋgaŋgək məs aryeɗi, kəkpaŋgaŋgək məlĩyeŋge məza də mənam ɓa, nəŋgəl bo kəsoŋ gən məlĩyeŋge gesiŋ vi nam zlaŋ məsam gən məlĩyeŋge də munokum.
9:Ya naw in ula wənan na Maŋgəlva aɗimək ka masləŋɗe en bayma. Mənam tat va ɗii mətaw kita aket namta ama heret ɗii pakə. Mənam tat va zəga nawla net ɗii na duniya pak də azet maslayɗe də ama heret ɗii pakə.
10:Məkpaŋgək dərweŋge vi wənna Krestu, amma nokum məsənaŋ zəga kənanaŋ də Krestu. Nam mədakəm mənani, amma nokum guromɗe kənanaŋ. Nam məzeləm mənani, amma nokum məgakdakokumi.
11:Ha gap payan kakaŋka, mənam tatə zəm saha sən maya dit meme, lukut bo tayazam ɓa, ya argəmənka, gəla nam bo tay ɓa.
12:Mənam tatəya də əɗɗa wəza sən kiyəm nawzəm namə, payan aramən zlaŋ mənam tatə pel wənnet mogoni, an tahəŋ ərmanən mamə, mənam tatə ɓəsən.
13:Ko tahəŋ əpeleŋ mbrayen akam zlaŋ, nam mənam tatə zlan sit də wəlam neki, uləmən va təki məfaɗən, va pəlu nadəv dəlva va gadərgiya.
14:Nəver sukum wənnəs də əɗum narbəsukum wil ɓa, amma nəver sukum vasna, vi karban sukum zəga va kirtu na makrawa.
15:Ko an kərəhaŋgək məzərbaŋ sukumən zəga aka wənna Krestu gap uzine klaw adəv pay nanziya nokum egge zlaŋ, Affukum tay ɓəɓɓay ɓa say taka, ya aka wənna zeŋgille kum məs kərəhaŋ də Zezu Krestu, əntə nəkpaŋ affukum vi əntə nəki sukum labara neneke.
16:Intatə kamokum, məsban wədaw nawa.
17:Ndəni nəslən Timote wətu na makrawa, ɗəf təstəssi də wənna Ɗəfdaya. Warban sukum wənna zeŋgille kum məs kərəhaŋ də Zezu Krestu, wən vani, ndəni məs nədarban sit kretiyenɗe atəki temtem pakə.
18:Ɗii meɓɓet suwalaŋkum tahəŋ wə gakdakanən ziti, azet na ndaw na ɗaah ulukum əmpa ɓa.
19:Amma an Ɗəfdaya eŋgerik na, əndaw annokumda gu'u. Wanəsən məzu peleŋ na gakdakan zitiŋka, ya anan nədawsən kaaka ɓa də gurom net pak nədaw sənən.
20:Vi məlĩ na Maŋgəlva tay də wənna pel ɓa, amma say də sembe na Maŋgəlva.
21:Mi kəŋglaŋ di? Ndaw gən anokumda də zleŋge sa. Walla də əŋgla sa, walla ndaw gən də wəgəsan zu sa?