Guidar_2/1CO.9.txt

1:Də kiyu nan ɓa sa? Masləŋ nan ɓa sa? Nula Ɗəfdaya nam ɓa sa? Nokum bo munokumtə ətər wəray na wəza naw vi Ɗəfdaya ɓa sa?
2:Ko an ɗii meɓɓet duluwən va masləŋ ɓa, azokum na naw masləŋ nan gesiŋ gesiŋ. Kəkpaŋgaŋgək ɗii na Ɗəfdaya, ndəni dərban na masləŋ nani.
3:Ɗii meɓɓet tay hãyawəni. Aŋki an məs nədawtər kiyu də wəzlan sit dəndən:
4:Zəga tay dətaku dataf zəga nawzəma, də zəga naw saa vi wəza naw sa?
5:Zəga tay dətaku dawmbat malaka, dət guluk məs tətaf Maŋgəlva va masləŋɗe meɓɓeti, dit milmiŋgiɗən Ɗəfdaya gəm vana Piyer adaɗɗaŋ sa?
6:Walla say ina də Barnabas kaaka mədaɗɗa wəza nawzəm gən kiyəm sa?
7:Soze naŋgay məzəm gən kiyən di? Naway nampa wəleŋɗe na biya na azəm na uwa net ɓa di? Naway məzutaɗ wazli na asə na momvo nan ɓa di?
8:Kədaɗumoŋ na, wənnan səza wənziya egge nəsla wənnan ɗarə ɓa, wənna ma henziŋ na Maŋgəlvayi.
9:Apprəm an məverin adəv ɗerewel na ma henziŋ na Moyis: Kədaw gul sən taɓak ama ngari darga hay ɓa. Vasna Maŋgəlva tayəɗum aka wənna ngari sa?
10:Vi wənnami anah vas ɓa sa? Gesiŋ aka wənnami məver wənnəska. Say məzəslga haya, də məzu bəl haya dəsoŋ də wəɗum nawrah haran net səzani.
11:Mənamtat əslga zəzay na əmpəs amakrokum. Ya an məbələk zəga na duniya səzokum na, wən metiŋgini sa?
12:Ya an zəga tay nawtak ɗii dawtaf zəga səvokum ɓa, nam məday na kiyit dərəŋ ɓa sa? Amma nam mətər wəray sən zəm də gakdak nam ɓa. Məsokuk zəm aza zəga pakə, vi mədaw bas tive na labara nenek na Krestu səbokum ɓa.
13:Kəsənənək lewlewi, məgəɗ wəza adəv gəla metiŋ naw zuliya*, zəga naw zəm nan bo sədəv gəla metiŋ naw zuliya adawrəhən. Mətawaŋ wəla zəga atəki naɗɗa sazlaga, də wətaw wəla zəga adawzəmaŋ.
14:Vaski bo, məzərbanən labara neneke. Ɗəfdaya aɗiyək wənnan na, dəzəmaŋ gən də wəza narban wənna Maŋgəlva.
15:Amma nəɗi ɗaah wənnan ka zəga natər su wəray ɓa. Nəver wənnan bo vi kassoh zəga dəndən nawtər su wəray ɓa. Ɗəɗaah nəmtə! Ɗəf tay naw zar gən əkaɓəŋ səzaw ɓa.
16:An əntatə pel labara neneke, nəŋger na əkaɓ ɓa. Dewle nawa say nəpel gəni. Bonoy nan tayabawa an nərban wənnan ɓa.
17:An nəɗɗak wəza nan dəŋgla na makrawa, asna anəɗum narəh riba nawa. Amma kakaŋ əntatəɗɗani, vi məɗi səwi wənnan naɗɗani. Va Maŋgəlva apan su a vawa.
18:Awani kan riba naw di? Ndəni nədarban labara nenek na mekeleŋ, əntatə sohon zəga məs mərbə labara nenek aslə na soh ɓa.
19:Naw balam nan ɓa, na ɗəf nan ɓa bo. Amma nəɗɗak zu va balam net ɗii pak vi nərah gən vadaysa net sən Krestu.
20:An əntatəɗɗa wəza aweleŋgit Yahudiyenɗe, inəɗi zu va Yahudiyen, vi nərihigin Yahudiyenɗe. In sən kiyu bo naw zelen dawka ɓa. Amma an əntatə saw dit ɗii məsbanən dawka na, naw bo in gəm əsbani, vi nərihi gini.
21:Vaski bo an əntatə saw dit ɗii məs dəsənən dawka ɓa, naw bo in kpaŋgan zu va neti. Nənah na nəsban na ma henziŋ na Maŋgəlva ɓaɓa, gesiŋgi bo əntatə əsban ma henziŋ na Krestu.
22:An əntatə saw dit ɗii məs dətafən Krestu mədekti, naw bo in əkpaŋgan zu mədakwa, vi nərihi gin dəkohoŋ gəni. Va wənah na wa nəkpaŋgan zu adəv zəga pakə, viyit ɗii pakə, vi ko də tive mi pak nərah gən əkoh git ɗii meɓɓeti.
23:As pak nədaɗɗan na vi labara neneki, ka nərah gən haran naw səza zəzay nani.
24:Kəsənənka ɗii diiɗa dədanzoŋ na naway dabəŋ di, amma say ɗəf taka kaaka dədawrəh zəga məɗiyən vi ɗəffan dənzan dəday kiyit ɗiiyi. Vaski nokum bo məsok zukum mənzoŋ kərəhaŋ gən zəga nani.
25:Ɗəf məs dəŋgəl dəday gən pak na, say dəsok zən əyagan ənzuwa pay pak dayadaya, vi dərah gən mətər kiya na gaslamba məs naw ɓəta. Amma namə mənam tatəɗum na, a mərah mətər kiya məza aray na ɓa.
26:Vini kana, əntatə zi haraw aka əgrak ənzuwa nawa. Intat va ɗəf məslkər ɗəffa, aslkər təki ɗar ɓa.
27:Intatəpsən bonoy sən zu diiɗa ka nəɓap gən wənnani. Ya əntə nərban wənnan sit ɗiiyi, nədaw saw məza nətoŋ adak ɓaɓa.