Guidar_2/1TH.5.txt

1:Amma milmiŋgiɗwa, klaza wənna pay na ziya na Ɗəfdaya, wəray tay nawver sukum aka wənnan ɓa.
2:Vi munokum sən kikum kəsənənka, pay wəziya na Ɗəfdaya tay va məhal adazan ɗəfɗa.
3:Pay adawnahaŋ na: Zəga pak zami də mogoni, əza wade aket mədəgirzike va daway ada waksət gulku, akohoŋ na ɓa samə.
4:Amma nokum, milmiŋgiɗwa, ara guzli kənanaŋ ɓa, vi pay nan adazan azokum mədəgirzike va məhal ɓa.
5:Munokum pak kirtin təki babar kənanaŋ, kirtin kapay kənanaŋ, ɗii nara guzli kənanaŋ ɓa, walla na dəfəɗ ɓa.
6:Vi vaski mədaw-ləŋ ɓa, vanet ɗii meɓɓet adawleŋgeŋ ɓa, amma məgasəmə mədasam gərəŋ gərəŋ ɓa.
7:Vi məzuleŋgeŋ dəfəɗ adawleŋgeŋ məzə grəŋgaŋ dəfəɗ ada grəŋgaŋ.
8:Amma namə ɗii na kapay mənani, məda grəŋ ɓa, say mugul səm wətaf va lukutu də wəɗup wəŋgla va petpete, də wəɗum naw koho.
9:Vi Maŋgəlva dəɗiyəm ka gədəvən dədə gən akam ɓa, amma aŋgələk mərah gən wəkoho də Ɗəfdaya nam Zezu Krestu.
10:Məs dəmtə vimə, vi məsam gən madaram dəndən, ko an məmtəka, ko məmtə ɓa.
11:Vi vaski məɓɓəlan zukum də wənnəska, va kədaɗɗaŋ laŋka.
12:Amma milmiŋgiɗwa, mənam tatə kamokum məɓe sit məɗɗaŋ wəza awaloŋkum, məs Ɗəfdaya aɗi abokum dərban sukumən gən zəga.
13:Məgakdaketi, məŋliwe, vi wəza məs adaɗɗaŋ awaloŋkum.
14:Mənam tatərban sukum, munokum milmiŋgiɗmə, məhayet mətampəlɗe, məsəɓ sit ɗii məs makret məmtən, məbaah sit ɗii məverti, məɓəs wənnet ɗii pakə.
15:Məzi zukum ɗəf adamnda gan sən ɗəf mambray də mambray ɓa, amma məsban wəɗɗa mogon pay pak awalaŋ zukum də azet ɗii pakə.
16:Məneken zukum pay pakə.
17:Məzuliyə kədapanən ɓa.
18:Məgəɗ soko vi zəga pakə, vi ndəni wəŋgla na Maŋgəlva azokum də Zezu Krestu.
19:Kədamtanən Əmpəs Salala* də wəza nokum ɓa.
20:Kədawzelenən wəza net məs kleŋɗe na Maŋgəlva ɓa.
21:Məsla wən pakə, mərma an mogon akokum.
22:Məsla zukum səza mambray pakə.
23:Maŋgəlva məs dədapsəm zamə, ndən sən kiyən də ɗikum ɗii təstəssə, dəga sukum əmpəs nokum də ma genegenekum də gəɓa zukum pakə, məza də mambray ɓa ha gap pay naziya na Ɗəfdaya nam Zezu Krestu.
24:Maŋgəlva məs dəyukuməŋka təstəssi, waɗɗa sukum wəza nani.
25:Milmiŋgiɗmə məzuli vimə.
26:Məsɗet milmiŋgiɗəm də wəsɗa ana məlma.
27:Intatə gəɗ sukum kamə də iya na Ɗəfdaya, məŋɗan ɗerewelis aweleŋgit milmiŋgiɗəm ɗii na Maŋgəlva pakə.
28:Mbəlembəle na Ɗəfdaya nam Zezu Krestu dəsan də munokum.