Guidar_2/1TI.5.txt

1:Kədaw hayãn ɗəf metiŋ də hay ɓa. An wən tay nawhayãn akan na, say apel sən va affuko. Gewleɗ bo, ahayẽt va milmiŋgiɗko.
2:Məduwiliɗ bo, ahayẽt va moko, gil bo ahayẽt va mamndayeŋgiɗko, də makrok taka.
3:Agakdeket gil net gəbayɗe, abaah siti an awrəhaŋ wəbaah səzet ɗii neŋgil annetda ɓa.
4:Amma an ga gəbay tat dit kirtəta gəm dəhiŋgiɗta, say net bo də yaganən wəɗɗa wəza nasban wənna taf Maŋgəlva, azet ɗii neŋgil annetda, də wəbaah sət meti walla atəti, vi wənnan mogoni vaska neki aza Maŋgəlva sawɓa.
5:Guluk na gəbay məs tat də ɗəf na baah sət ɓa, tatə gan nawrəh zam aza Maŋgəlva, tatə zuli səni də wəkkamani kapay də dəfəɗ pak vi tərah gən wəbaaha.
6:Amma guluk na gəbay məza kay wəsuwa adəv nenek na duniya, nat məmtətə, ko vi təsat madarat zlaŋ.
7:Aski kan kədawnah sit gil net gəbayɗe, vi ɗəf adawrəh wən nawhayẽt akan ɓa.
8:An ɗəf aslga sləma wəbaah sit milmiŋgiɗin, walla ɗii neŋgil annanda ɓa, asna azelenək wənna Maŋgəlva, ɗəɗaah ɗəf məs dətaf Maŋgəlva ɓa kini.
9:An ga gəbay təgap wəsva kaklaw slire ɓana, kədawver iya nat azet gil net gəbayɗe ɓa, təsat ɗak məs təɗi zil taka kaaka'ə.
10:Say ɗak nat wəza mogon nat dərbat gəni, məs təɓay git kirtət mogoni, məzu taf melekeɗi, məzəskoɓ təlit ɗii na Maŋgəlva, məzəbaah sit ɗii adəv saha neti, təsat məgəɗ zev wəza mogon pakə.
11:Amma aɓoŋ dawver iya net gil na gəbay məs dəgalaŋ ɓa. Vi adaw simeŋ zel kapan Krestu, kaw gəmaŋ zel ɓa.
12:Vasna wakpaŋgan məɗɗaŋ mambraya, wapanən wətaf an məs makret aynani.
13:Vas bo adaw sərəkaŋ məza aɗɗaŋ wəza ɓaɓa, adasoŋ məzə balaŋ a megge də awalaŋ gəla ɗarɗar ɓa. An day əmpa bo adasoŋ məwaŋ tepelke ɓa, də wətoŋ aka wən məza wənneti ɓaɓa, vi kawpeleŋ an məs dəslə azet nawpel ɓaɓa.
14:Vi wən vas kəŋka, naw nəŋgəl na ɗəɗaah gil zemvit vas dəkayaŋ zel əmpa'a dəwaŋ gən kirni, dəgayaŋ gən də wərma gəla neti, vi məzu zelmən adawrəhaŋ tive nawpel mbrayen akam ɓa.
15:Gesiŋ nədawnaha, gil net gəbayɗe meɓɓet amzləhaŋgək ki tive an də goŋga, tahəŋ wəsbanən Satan.
16:An ɗak məs tətaf Maŋgəlva tat dit gil net gəbayɗe eŋgil annatda na, say təbaah siti, vi wəza nan adaw day kiyit də tuwãh azet kretiyenɗe ɓa. Net Kretiyenɗe na, wabaah sitin gil net gəbayɗe məs tahəŋ dit ɗii narma vet ɓa.
17:Ɗii gugiriɗ net kretiyenɗe məɗɗaŋ wəza mogoni, net agapaŋgək nawrəh zəga agəla iya net təɓələn sula, an dəday pak van əmpa na məzu peleŋ wənna Maŋgəlva sit ɗii də wərbansiti.
18:Vi ɗerewel məsvan anahək na: Kədawgul taɓak ama wasli məzərga hay ɓa. Vaski bo məgəɗ wəza na Maŋgəlva agapək nawfaɗsən zəga vi wəya nani.
19:Kədawtaf kita aka daya net kretiyenɗe ɓa, say də saydawa sula walla hoku, vasna wənnan wasan gesiŋ.
20:Məzəɗɗaŋ mambray pak say a hayyet karet kretiyenɗe pakə, vi ɗii məs dəppaŋ də geslne'eŋ gəni.
21:Intatə kamok aba Maŋgəlva də aba Zezu Krestu dit maslayɗe məs məwelti, say kəsban gən wən məs nənah sukus pakə, kədaɗɗe ɗii temtem ɓa, kədawday gən ko ɗəf taka aka wəza nok də wəɗum nok ɓa.
22:Kədawɗi vok aka ɗəf də kakara napan sən wəza aweleŋgit kretiyenɗe dəɗɗa gən ɓa, kədawsap də mambray net ɗii ɓa, aga kiko kəsok gən təstəssə.
23:Kədawsaa iŋkile kaaka ɓa, ɗəɗaah asə mbazla suɗike, vi dəgəɗ suku gən ɗəɗaah na gədəv kuŋka gəm vi gbəgba' məs dədasbokəŋka.
24:Mambray net ɗii meɓɓeti appasək daga kita dəɓəl ɓa, net ɗii meɓɓet bo kappas dərɓaga wənnani.
25:Vaski bo wəza mogon wənnan wappasə. Ko vi asan məɗamən kakaŋ zlaŋ, gesiŋ wappasə.