Guidar_2/2CO.12.txt

1:Dewle anəkaɓə, ko an əkaɓ nan atər su na wəray ɓa. Say nəpel wənnet sokeneɗ məs Ɗəfdaya arbet suwa, də hənhən məs avayə.
2:Nəsənək ɗəf maɓɓan kretiyen. Agəɗək əsva klaw kiyən poɗo kakaŋka, məslani a disiŋ ha adəv disiŋ ma hoko'ən. Gesiŋ aslan sa, walla issine sa? Nəsən ɓa say Maŋgəlva dəsən kaaka'ə.
3:Nəsənək gesiŋ bo, ɗəf nan məslani, məkani a paradis. Wən nan vaski gesiŋ sa, walla issine sa, nəsən ɓa say Maŋgəlva dəsən kaaka'ə.
4:Sədak sə paradis vani apprəm wən məɗamaska, ɗəf tay naw ɓap əpel wənnan ɓa.
5:Anəkaɓ vi ɗəf nani amma nəkaɓ na vi zəknaw ɓa. Asna say aka an narban əvir nawa.
6:Ko an nəŋgələk əkaɓa, dərwa nan ɓa, ya anənah goŋga. Amma nəŋgəl na əkaɓ ɓa, vi ɗəf adawrəh əɗum maɓɓan azaw mbəksa an awəl azaw də an apprəm səmawa.
7:Nulek sokeneɗ məs kaw ɓapi irbet ɓa. Amma vi nədaw gakdakan zu də wənnan ɓa, ndəni Maŋgəlva avay su gbəgba' aka gəɓa zu nasiya vaska, tay va masləŋ na Satan məzu vərwa, vi nədaw gakdakan zu ɓa.
8:Təl hoku nəkkaman Ɗəfdaya ka dəkdəh suwə gən gbəgba' nani.
9:Amma yaŋ azlan su na: Mbəlembəle naw watər suk wəray nok pakə. Pay kəsok məddako, dəpaski sembe naw adaɗɗaŋ wəza də is day. Kakaŋ na anəɓəs ədak naw də ənek nawa, əntatə kaɓ dənɗaŋ vi sembe na Krestu dəsoŋ gən də ina.
10:Vini, anəneken zu vi ədak nawa, anəneken zuwa an ɗii arawənka, akayanənək mawa, an gəkgrəŋ də əzəm saha arəwək vi wənna Krestu. Vi pay məs nəsaw mədakwa, dəpaski nədaw saw də sembe.
11:Gesiŋ va dərwa nədaw pele, amma munokum kəɗɗaŋ suwən dewle nəpel gən vaska. Vi kəɗɗaŋ saydawa akaw va an dəslə ɓa. Vi ko əntat də zəga ɓa zlaŋ, əntat də tive naw saw dərɓeget mesliŋɗe nokum məs gugiriɗe ɓa.
12:Wəzeɗe eŋkiŋ pak dərbanən awaloŋkum na, masləŋ nani, nərban sukumək əɓəs naw grakə, nəgəɗək sokeneɗi də wəza məs naɗɗa də sembe, amma sembe nawi ɓa.
13:Tay məs məgəɗ sit kretiyenɗe meɓɓeti nəgəɗ sukum ɓa sa? Nəkay tive ka kətər suwə gən wəray naw ɓa. Məviyan su mambray nani.
14:Kakaŋ na əntatəzaɓan zu nadaw annokumda ma hoko'ən. An nəgapka, nəsaw na azokum va doŋgol ɓa. Annokumi nəŋgəl ɓana, anet deleɗ nokumi ɓa. Gesiŋ vani, kirin asgilin na migilit ɓa, amma migilit də dasgilin kirni.
15:Azaw anaw sən kiyu na, zu neki də əsgan zəga naw pak də zək naw pakə, vi kabaah sukum. Akə gəsanən əŋgla məs kəŋgəluwən vi nəŋgulukum diiɗa sa?
16:Zəga nawbay makani ɓa, nəsaw gədak azokum ɓa, kuzuŋ ɗəf wanah na, nərəmkumək də kuket naw sokoh.
17:Ɗii tahəŋ məs nəslən azokum, vi dəmohən gən zəga nokum sa?
18:Nəslənək Titus annokumda də məlməm məs kəsənaŋ. Ya amohuk zəga səvokum sa? Mənam sula gəm pak də makram taka mədaɗɗa wəza, tive taka mədasban ɓa sa?
19:Kuzuŋ munokum tatə nahaŋ vas daga far soko, ndəni mədaŋgla əskoɓ kiyəm abokum. Wən nan tay vas ɓa sam! Mənam tatə pel aba Maŋgəlva va ɗii na Krestu. Milmiŋgiɗəm na makramə, mədawpel vas pak na, vi kawɓay gukum adəv ətaf nokum.
20:Geslne duwəka, pay nədadaw annokumda, nərəh kum na aka tive nan va nəŋgəl ɓa, nokum bo kərəh wənna va kəŋglaŋ ɓa. Geslne duwəka, pay nəda zaw annokumda na: Wanərah wəgaya də kotoroku də wəda gədəva də əlpa də əpel mbrayen də tepelke, də wəgadakan zə ɗəffa də ɗarɗar pak awaloŋkum.
21:An nədek annokumda əmpa na, nəŋgəl Maŋgəlva naw dəgəsgəwə gən ɓa, ka nəhəm gən viyit ɗii diiɗa məɗɗaŋ mambraya, ya də tubiyaŋ ɓa, dəppanən wəɗɗa zəga daryaw ɓa, də wəɗɗa mana'a də ɗarɗarə.