Datasets:

flagship-ai
/

cameroon_bibles

+1:Wən na tok məs kəssohowən adəv ɗerewel nokuməŋ bo, lewi an ɗəf asanək məza əkay guluk ɓa.
+2:Amma vi wən naɗɗa mana'a, ɗəɗaah ɗəf pak dəkay gulkuni guluk bo təkay zilta.
+3:Ɗəf mizilin dətər sət wəray nat goni, guluk bo tətər sən wəray na zilta.
+4:Gəba zət gulku natti ɓa, na zilti, vaski bo ɗəf mizilin gəba zən nani ɓa, nat goni.
+5:Kədaw ɓoŋgoŋ sənən zukum daw voŋ ɓa, say an kəslereŋgək akani vi kərəhaŋ gən pay nakama, dərɓagan na kəsapaŋ gən əmpa, vi Satan adawrakokum ɓa, vi kəɓapən na ərma makrokum ɓa.
+6:Amma nənah sukum vasna, tay va dawka ɓa, amma wənnan apəl sukumək tive.
+7:Nəŋgəl kətana ɗii pak dəsoŋ gən vanawa, amma ko naway pak də an məs Maŋgəlva apsəni. Ɗəf mbərən Maŋgəlva apsənək vaska, ɗəf mbərən bo temme.
+8:Intatə nah sit ɗii məs dəɗiyaŋ ɗaah gil ɓa dit gorɗeŋge, dit gil net gəbbayɗe, lewi kəsoŋ gən katərgukum vanawa.
+9:Amma an kəɓapən na ɓa, ɗəɗaah məkay gili. Vi gəba zukum adaw ki mokum ɓa.
+10:Amma ɗii en dəkayaŋgə, əntatə nahsiti, (əntə ɓa amma Ɗəfdayayi dənahə) guluk tədawɗak də zilit kpak ɓa.
+11:Amma an tuɗakək də zilit na say təsat gən məza zilit ɓa, walla təsler gən mat də zilit əmpa: Ɗəf mizilin bo adawɗak dət gon ɓa.
+12:Amma ɗii meɓɓet bo, əntat nahsiti, məza Ɗəfdaya ɓa an ɗəf na Maŋgəlva tay dət guluk nan məza tətaf Maŋgəlva ɓa, amma an tətafək na watəsat dəndən, adarɓahat ɓa.
+13:Vaski bo an guluk tat də zilit məza dətaf Maŋgəlva ɓa, amma an atafək na wasan dənta, tədawgilyat ɓa.
+14:Ɗəf mizilin məs dətaf Maŋgəlva ɓa, mətafni aba Maŋgəlva amba əsap nan dət goni, vaski guluk məs tətaf Maŋgəlva ɓa bo, mətafti aba Maŋgəlva amba əsap nat də zilit ɗəf na Maŋgəlva. Amma an vaski ɓa kirtit wasoŋ va kirtit ɗii məs dəsənən Maŋgəlva ɓa, amma kakaŋ na salalaŋgə.
+15:Amma an ɗəf məs dətaf Maŋgəlva ɓa, manaka uɗak də ɗəf məs dətaf Maŋgəlva, məppani. Asna ɗəf na Maŋgəlva walla guluk təsən Maŋgəlva akohoŋguk səka balam naw gəm ziti. Maŋgəlva ayukum na ka kəsoŋ gən zami.
+16:Is gulku, akəɓap wəkoh gən ziluk sa? Walla is ɗəf mizilin wa kəɓap wəkoh gət guluk nok sa? Gesiŋ kəsən wənnan ɓa.
+17:Say ko naway dədaw gən va Ɗəfdaya apsəni dəsan va gala Maŋgəlva aya. Aski dawka naw an nəɗi aweleŋgit ɗii na Maŋgəlva pakə.
+18:An Maŋgəlva ayak ɗəf daga askələk awra səkay, adaw kay wəkpaŋgan gəlan ɓa, ya an Maŋgəlva ayak ɗəf daga dəɓəl əskəl awra ɓa, adaskəl awra ɓa.
+19:Vi əskəl awra də məskəli awra sula gən pak atər na wəray ɓa, say wəsban əpel na Maŋgəlva kaaka dədawtər wəray aza ɗəffa.
+20:Say ko naway dəsan va gala Maŋgəlva arəh aya.
+21:An balam kənan gala Maŋgəlva ayuko, adosok ɓa. Amma an kərahək sembe naw bit kiko, say kəbit gəni.
+22:Balam məs Maŋgəlva ayə, nan abitik kini vi na Ɗəfdayayi kana. Vaski bo də ɗəf məs balami ɓa, an Ɗəfdaya ayaka, nan akpaŋgək balam na Krestu.
+23:Ɗəfdaya abitkumuk də zəga na sləma. Vi wənnani kədakpaŋganən zukum balemɗe net ɗii ɓa.
+24:Milmiŋgiɗwa, say ko naway səmbokum dəsan aba Maŋgəlva va gala Maŋgəlva arəh aya.
+25:Yo aka wənnet gorɗeŋge nan nərah dawka akan səza Ɗəfdaya ɓa, amma əntatə pel an məs nəɗumu. Ɗəfdaya apsuwək mbəlembəle gəm mogon nani Ɗəfdaya aɗiwək ka ɗəf təstəssə.
+26:Wən aŋki məs nəɗum vani: An ɗəf dəɗi ɗaah guluk ɓa, ɗəɗaah səni vi wənna duniya kakaŋkəŋka.
+27:An istat dət gulku, kədaw kay uɗak dəndət ɓa. Ya an istat də guluk ɓa, kədaɗum naw kay ɓa.
+28:Amma an kəkayək gulku, kəgəɗ mbrayen ɓa. Vaski bo an waŋ goruk təɗiyək zile, təgəɗ mbrayen ɓa'a. Amma nəŋgəl kəta əzəm saha nan dəsan gən ɗəɗaah azet ɗii dəɗiyaŋ gili dit gil məs dəɗiyaŋ zeli.
+29:Məlmiŋgiɗwa aŋki məs nədawnah sukum: Pay dəmbər dədaya ɓa, ɗiiyen dit gili dəsoŋ gən va məza tahəŋ dit gil ɓa.
+30:Ɗiiyen məzuhəmaŋ bo, əska morkoyo adaw day kiyit ɓa, məzə masaŋ ɓo, nenek adaw day kiyit ɓa, məzəlbaahaŋ zəga bo, dulanən va tahəŋ də zəga ɓa.
+31:Məzəɗɗaŋ wəza na dəlva adaɗɗanən də makret akan kaaka pak ɓa, vi duniya va asanəŋka wakgrakə.
+32:Nəŋgəl na kəsoŋ gən məza balemɗe na grəŋgrəŋ ɓa. Ɗəf məs dəɗi guluk ɓa, nan sən wəza na Ɗəfdaya adaw gay səni, an naneken zə Ɗəfdaya adaɗɗa.
+33:Amma ɗəf an dəɗi gulku, sən wəza na duniya adaw gay səni. An naneken zet goni adawkaya.
+34:Vaski maɗulan awɗakək sula. Vaski bo guluk na gəbbaya walla məs tuɗak də zilta, walla waŋ gorku, sən wəza na Ɗəfdaya tədaw gay səni, vi təsat gən salala də gəɓa zəta gəm də əmpəs nat pakə. Amma guluk akən namba zile, sən wəza na duniya tədaw gay səni, an naneken zə zilta.
+35:Nədawnah vasna, nəŋgəl kabaah sukum, nəŋgəl ətakum ɓa. Nəŋgəl na ədaw nokum dəsan gən mogoni, məgəɗ sən wəza sən Ɗəfdaya də makrokum taka.
+36:Kuzuŋ ɗəf wasler dət grani mədaw gəm zəm ɓa, yaŋ adaɗumon na əppat vasna tay lew ɓa, yaŋ bo əŋgla naw gəmət bo tayənzləra amakrani. An vaski na, ɗəɗaah də gəmən ziti mbrayeni ɓa.
+37:Amma an əɗum nan aziwke, zəga tay dəgəɗ sən dewle ɓa, gəba zən bo tay ki man ɓa, asna derma əɗum nani, adaw gəmət gran vat ɓa.
+38:Ɗəffan də gəmət grani, agəɗək mogoni, ɗəffan də gəmət gran ɓa, ndən dəgəɗ mogon day.
+39:Guluk namba zile nat minatə an zilit dəɓəl əmta ɓa. Amma an zilit amtəka, təkohuk səka balam naw gəm ziti. An təŋgəlka, atəgəm ɗəf mbərən, amma say təgəm gən ɗəf na Ɗəfdaya.
+40:Amma zət wasan nek diiɗa an təsatək məza zil ɓa. Aski kan əɗum nawa. Amma naw bo əntatə ɗum na əntat də Əmpəs na Maŋgəlva.