Datasets:

flagship-ai
/

cameroon_bibles

+1:Daga far laŋka, Maŋgəlva apel sitik dəhiŋgiɗəm də tive temtem diiɗa, də met məs kleŋɗe.
+2:Amma aza wəgrak na pay nan kana, Maŋgəlva apel səmək də ma Wətəni. Dəni Maŋgəlva azəməɗ dəlva də təki a disiŋ, Maŋgəlva awelik ka zəga pak dəsan gən kanan ha faɗə.
+3:Wətən Maŋgəlva* tayərban təki babar na gakdak na Maŋgəlva, agilik va Maŋgəlva, tayərma dəlva də wəpel nan məs də sembe. Dərɓaga askoɓ mambray net ɗii nani, asanək a disiŋ dəka van dəzəŋ na Maŋgəlva məs də gakdak pakə.
+4:Wətən Maŋgəlva adayək kiyit maslayɗe də gakdaka, Maŋgəlva apsənək iya dayki iya neti.
+5:Vi Maŋgəlva dənah sən maslay ɗaah na: Wətu kənani, nəwəkuk dəpaŋka ɓa. Dənah sən ɗaah maslay na: Wanəkpaŋ Affuko, nok bo wakəkpaŋ Wətuwa ɓa.
+6:Amma adan Maŋgəlva tay gu'o nawslən Wətən an dabəŋ nan aka dəlva, amna: Say maslayɗe na Maŋgəlva pak dukdukoŋ sənən gəni.
+7:Apprəm an Maŋgəlva apel aket maslayɗe nani: Maŋgəlva akpaŋgetik maslayɗe nan səmnya, məɗɗaŋ wəza nan bo enzil offoŋ.
+8:Amma an məs anah aka Wətən Maŋgəlva na: Mazaŋga na məlĩ noko, aw Maŋgəlva wasan ha faɗə, istatə zəm məlĩ nok də tive təstəssə.
+9:Kəŋgluwək goŋga, kəzelik tepelke. Vini Maŋgəlva məs Maŋgəlva nok awelko, annekenək zuko dəwəpsuk gakdak an dədayki məs apsit ɗii məs dədasoŋ di'isi.
+10:Yaŋ anah əmpa na: Aw Ɗəfdaya kəzəməɗək dəlva fuŋ daga wətəŋ nani, istə kəzəməɗ təki a disiŋ də voko.
+11:Net zigeɗis wagrakaŋ pakə, amma noko wakəsok ha faɗə. Net waŋgisiɓeŋ pak va lukutɗe,
+12:wakəktim va lukut metiŋ. Wakpaŋgaŋ va lukutɗe ɗarə, amma nok na kəkpaŋ na ɓa, kəgal na ɓa.
+13:Maŋgəlva dənah sən ɗaah maslay na: Asok aka vaw dəzəŋ, nəvoŋgiti gən məzuzel kun ka təki naw ɗi tulko ɓa.
+14:Mədəŋgaŋ maslayɗe di? Ndəɗaŋgəŋ Əmpəsɗe məzəɗɗaŋ sənən wəza sən Maŋgəlva. Maŋgəlva tay slinit dəbaahaŋ sitin gən ɗii məs dədawkohoŋ.