Datasets:

flagship-ai
/

cameroon_bibles

+1:An ɗəf tay suwalaŋkum dəŋgəl əwəli ɗəf maɓɓani, ya vimi adawkan aka kita net ɗii məs dəsənən Maŋgəlva ɓa di, mba gən məzawkan abet ɗii na Maŋgəlva dərəŋ ɓa di?
+2:Kəsənən na ɗii na Maŋgəlvaŋ nawtaw kita aka duniya ɓa sa? Ya an munokum tə na taw kita aka duniya na, kəɓapən na wətaw kita aka wən suɗike ɓa sa?
+3:Kəsənən na mənamtə nawtaw kita aket maslayɗe ɓa sa? Sokənta wənna duniya ɗar sa?
+4:An munokum tat də wənna kita awalaŋ zukum, munokum gəmə kanən abet ɗii ɗarə mbegit ɗii na Maŋgəlva vi mi vas di?
+5:Nədawnah sukum vasna, vi karbə sukum wili. Haa'aw, ɗəf tay suwalaŋ kum dəsən zəga naw zaɓan wən aweleŋgit ɗii na Maŋgəlva ɓa sa?
+6:Ya vaskana, mogoni kan an wən tay awalaŋ ɗəf də məlmən na, dəka gən kita nan abet ɗii məs dətafən Maŋgəlva ɓa kan sa?
+7:Gesiŋ mbrayen taya walaŋkum, vi ɗəf tayə wəli məlmən əkan aka kita. Vi mi kaw ɓəsən wənnan ɓa di? Ɗəɗaah məppan wəhãl zəga na zukum vaskəŋka.
+8:Mbaraka dərəŋ na munokumtə məɗɗaŋ mambraya, munokum tatə hãlaŋ, vaski kədaɗɗaŋ sitin milmiŋgiɗkum.
+9:Kəsənənək wənnan lewlewi, məɗɗaŋ ɗar ɗar atoŋgoŋ na məlĩ na Maŋgəlva ɓa. Kədazlaɓanən zukum ɓa! Ɗii matakatakeɗi, walla məsbaŋ matuya, walla məɗɗaŋ mana'a, walla ɗii məvənaŋ dit zel tusso,
+10:walla zel məkpaŋgaŋ va gili, dit məhẽleŋɗe, dit məŋglaŋ riba mbrayen, dit məs mbazla adaw baya, məs kotorokɗe, məzuraŋ ɗiiyi, məvəŋgoŋ tive zemvit ɗi'is pak atoŋgoŋ na Məlĩ na Maŋgəlva ɓa.
+11:Ɗii suwalaŋkum bo, tayəɗɗaŋ veneti. Amma ya nokum na, mbrayen nokum məviyani, məwel kumi, kəsoŋ gən kana Maŋgəlva, məkpaŋgo kumi də iya na Ɗəfdaya nam Zezu Krestu, gəm də Əmpəs na Maŋgəlva.
+12:Ɗii meɓɓet suwalaŋkum tay nahaŋ na: Tive tay nəgəɗ gən zəga pakə, vaski ya amma, zəga pak mogoni kəɗɗanən gən ɓa. Ya wanəɓap wənah na: Intat də tive naɗɗa zəga pakə, ya nəŋgəl nəppan gən zu dərəm wə gən kakpaŋgaw ka balam nan ɓa.
+13:Munokum tatə nahaŋ na: Gədəv ɗəffa, tay vi waya, way bo tay vi gədəv ɗəffa, vaski, ya Maŋgəlva wazet sulegit pakə. Amma na gəɓa zə ɗəf na tay vi mana'a ɓa, say vi Ɗəfdaya, Ɗəfdaya bo vi gəɓa zə ɗəffa.
+14:Maŋgəlva asil gənək Ɗəfdaya sətəki əmta, nam bo wasil gəm sətəki əmta də sembe nani.
+15:Kəsənən na gəɓa zukum zəgeɗ na zə Krestu wəŋ ɓa sa? Kəŋglaŋ kana kaw gəm gəɓa zə Krestu kakpaŋgan zət bivrak sa? Agəɗ na ɓa!
+16:Kəsənən na an ɗəf asapək dət bivrak na, gəɓa zit takayi ɓa sa? Ya ɗerewel anahək na: Ndəɗaŋ sulegit pak akpaŋgaŋgək gəɓa zit taka.
+17:Amma ɗəf məs dəsap də Ɗəfdaya, əmpəs net takay asap dəndən.
+18:Məzar səza wəɗɗa mana'a. Mambray məs ɗəf adaɗɗa pakə, appaka na gəba zəɗəffi, amma ɗəf məgəɗ mana'a mbrayen adaɗɗa ka kiyən.
+19:Kəsənən na gəbazukum na ndəni gəla metiŋ naw zuliya* sən Maŋgəlva, ndəni nasuwa na Əmpəs Salala, əmpəs vani, ndəni amakrokum məs Maŋgəlva apsukum ɓa sa? Munokum tat kana zukum tusso əmpa ɓa, amma kana Maŋgəlva kənanaŋ.
+20:Maŋgəlva abit kumko, afaɗək vini, vi wənnəski məgakdakan Maŋgəlva də gəɓa zukum.